डडेल्धुरा। डडेल्धुराको गन्यापधुरा गाउँपालिकाकी मीना देउवा मिस ग्राण्ड नेपाल २०२५ मा प्रभावशाली उपस्थिति जनाउँदै उपाधि जित्ने बलियो दावेदारको रूपमा अगाडि बढिरहेकी छन् । आत्मविश्वास, सशक्त अभिव्यक्ति, सौन्दर्य र प्रतिभाको अद्भुत संगमले उनले प्रारम्भिक चरणदेखि नै निर्णायक मण्डलको ध्यान तान्न सफल भएकी छन् ।

मीना केवल सौन्दर्य प्रतियोगिताकी प्रतिस्पर्धी मात्र होइनन्, उनी सफल युवापुस्ताकी एक उद्यमी पनि हुन् । स्नातक अध्ययन गर्दै गरेकी मीना गाउँको सामान्य परिवेशबाट राष्ट्रिय मञ्चसम्मको यात्रा तय गर्दा आफ्नो संघर्ष, मेहनत र आत्मबलको कथा पनि साथ लिएर आएकी छन् । उनका बुबा शेरबहादुर देउवा र आमा धर्मादेवी देउवाको साथ र प्रेरणाले उनले व्यवसायिक तथा सौन्दर्य दुबै क्षेत्रमा आफूलाई सशक्त रुपमा उभ्याएकी छन् ।

हालै सम्पन्न ३५ दिने प्रशिक्षण कार्यक्रम सफलता कायम गर्दै उनी अब साउनको अन्त्यमा आयोजना हुने ग्राण्ड फिनालेतर्फ अघि बढेकी छन् । यदि मीना देउवाले उपाधि जित्न सफल भइन् भने उनलाई नगद पुरस्कारसहित स्कूटर, ‘गुडविल एम्बासडर’को पद, चलचित्र अभिनयको अवसर तथा अन्तर्राष्ट्रिय स्तरमा नेपालको प्रतिनिधित्व गर्ने अवसर समेत प्राप्त हुनेछ ।

अहिले मीना देउवा आफ्ना समर्थक र शुभचिन्तकहरूबीच तारा भनेर चिनिन थालेकी छन् । उनको आत्मविश्वास र प्रस्तुतीले दर्शकहरूमा उच्च आशा जागेको छ ।