2019-Feb-17, Sunday

भीनपा कार्यपालिकाको २० औं बैठक नगरको इ प्रोफाइन निर्माण गरिने

महेन्द्रनगर, ३१ भदौ

भीमदत्त नगरपालिकाले नगरपालिकाको इ प्रोफाइल निर्माण गर्न भएको छ । नगर कार्यपालिकाको २० आंै कार्यपालिका बैठकले आइतबार इ प्रोफाइल निर्माणका लागि खर्च सहित प्रस्तावना पत्र स्वीकृत गरिएको छ । कार्यपालिका बैठकबाट ई प्रो फाइल लगायत नगर प्रहरी सम्बन्धी कार्यविधि–२०७५, गौशला सञ्चालन मापदण्ड–२०७५, पुरस्कार छनौट तथा वितरण मापदण्ड २०७५, एफ.एम. रेडियो (व्यवस्थापन तथा सञ्चालन ) कार्यविधि २०७५, करदाता शिक्षा तथा राजश्व संकलन सम्बन्धी अभिमुखीकरण सञ्चालन र महाकाली नदीमा रोयल्टी ठेक्काका लागि न्यूनतत अंक तोक्ने निर्णय गरिएको छ । महाकाली नदीको रोयल्टी ठेक्काका लागि ३ करोड ७५ लाख न्यूनतम अकं तोकिएको छ । यसैगरी रौटेला, कामिकाटे र खन्ने लगायतका खोलाका लागि १ करोड २५ लाख न्यूनतम अंक तोकिएको छ । भीमदत्त नगरपालिकाका नगर प्रमुख सुरेन्द्र विष्टको अध्यक्षतामा पत्रकार सम्मेलन गरी कार्यपालिका बैठकका निर्णय सार्वजनिक गरिएका हुन् । नगर कार्यपालिकाका प्रवक्ता राजेन्द्र पाण्डेयले बैठकका निर्णय सहित प्रेस वक्तव्य वाचन गरेका थिए । नगर प्रमुख विष्टले जारी गरेको वक्तव्यमा निर्मला पन्तको बलात्कार र हत्या प्रकरणपछि उनलाई न्याय दिन नगरपालिकाका गरिएका पहल र सहयोगका निर्णय सहित व्यक्ति केन्द्रित गरी आन्दोलन सार्वजनिक र व्यक्तिगत सम्पत्ति तोडफोड गरिएकोमा दुःख व्यक्त गरिएको छ । आगामी दिनमा आन्दोलनलाई संयमित र व्यक्ति केन्द्रित नगरी सबैले निर्मलाका न्यायका लागि संयम भएर आन्दोलनमा आउन आग्रह गरिएको छ । शान्ति सुरक्षाको क्षेत्राधिकार भित्र नपर्ने नगरपालिका केन्द्रित आन्दोलनले दैनिक कामकाज र विकास निर्माणमा अवरोध आएकाले आगामी दिनमा यसतर्फ सचेत हुन सबै नगरवासीलाई आव्हान गरिएको छ । पत्रकार सम्मेलनमा नगर प्रमुख विष्टले तेस्रो नगर सभाबाट पारित नीति अनुसार कार्यक्रम कार्यान्वयन गर्न लागिएको जानकारी दिए । ‘तेस्रो नगर सभाबाट नगरको समृद्धि र विकासका लागि नीति तथा कार्यक्रम पारित गरिएका छन्, अब तिनका कार्यान्वयनमा जान्छौ’ नगर प्रमुख विष्टले भने । भीमदत्त नगरपालिका क्षेत्रमा निर्मला पन्तको बलात्कारपछि हत्या गरिएको सहित एकपछि अर्को घट्ना भएर नगरवासीले असुरक्षित महसुस गर्न पर्ने अवस्था आएको उल्लेख गर्दै उनले सामाजिक अपराध न्यूनीकरणका लागि स्थानीय स्तरमा अभियान सञ्चालन गर्नु पर्नेमा जोड दिए । निर्मला पन्तको हत्यामा संलग्नलाई कानुनी दायरामा ल्याएर कारवाही गरिनु पर्नेमा जोड दिर्दैं उनले आन्दोलनमा बल प्रयोग गरिएको सम्बन्धी अनुसन्धान गरिनु पर्ने बताए । अपराधका घट्नामा समाज एक भएर जानु पर्नेमा जोड दिर्दै नगर प्रमुख विष्टले शान्ति सुरक्षाका लागि नगरपालिका सबै पक्षसित समन्वय र सहकार्य गरी जान तयार भएको बताए । नगरपालिका कार्यालयबाट सम्पादन हुने सबै कामकाज पारदर्शी हुने उल्लेख गर्दै उनले पत्रकार सम्मेलन, स्थलगत अनुगमन, अवलोकन, पत्रकार महासंघसित सहकार्य र समन्वय लगायतका कार्यक्रम गरिने जानकारी दिए । कार्यक्रमा नगर प्रमुख विष्ट सहित प्रवक्ता पाण्डेय, नगरपालिका कार्यालयका सूचना अधिकारी हरि सिह धामी लगायतका सहभागी भएका छन् ।